لاعب الزمالك يخرج عن صمته بعد الاستغناء عن خدماته.. صورة

خرج محمود حسن لاعب الزمالك الشاب عن صمته، بعد أن تم الاستغناء عنه واستبعاده من قائمة الفريق الأبيض، وتوجيه الشكر له من قبل إدارة القلعة البيضاء.

وكتب حسن عبر حسابه الشخصي على موقع التواصل الاجتماعي “فيسبوك”: “حابب أوضح حاجه لجماهير نادي الزمالك، انا اتصابت يوم 26-6 في مُعسكر اكتوبر ، وفضلت شهرين في موضوع الورق وبنخلص الحاجه و الكلام ده وعملت العملية يوم 22-8-2019 الحمدلله رغم ان مجلس الادارة يعلم بوافاة ولدتي يوم العملية وظروفي بعد ما عملت العملية ، وبعد ما رجعت من المانيا طلعت عشان اشكر ” سيادة المستشار”.

وتابع: “لقيت كاميرات واطلب مني اني اعمل فيديو اشكر فيه مجلس الادارة و النادي علي العملية ومصاريفها وعملت الفيديو وشكرت النادي اللي خيره عليا ، بعد ما عملت الفيديو ” أ. امير مرتضي ” قالي انت مش علي ذمة النادي”.

وأضاف: “بعد ما لعبت في النادي 17 سنه ، العب يا محمود حاضر اتصعد يا محمود حاضر اطلع بره الاسكور حاضر ، ومكنتش بقدر افتح بوقي عشان خاطر النادي اللي اتربيت فيه واترفضلي 7 اعارات الموسم اللي فات ، ومردتش اتكلم وساكت عشان خاطر انا ابن النادي واهم حاجه استقرار النادي آولا ، كل ده قولت يمكن ارجع تاني بعد ما اخلص الجلسات”

وأكمل: “،النهارده ” أ. احمد مرتضي ” كلمني بيقولي انت مش هينفع تاخد فلوس عشان انت مش علي ذمة النادي ، والحاجه الوحيده اللي نقدر نساعدك فيها ان نوديك فرقة لما ترجع في شهر واحد ، وانا كنت ماضي خمس سنين عدي سنتين وكده لسه فاضل في عقدي 3 سنين ، وحتي النادي مدانيش السنه اللي اتصابت فيها ، والنهارده تم الاستغناء عني رسمي. شكرًا نادي الزمالك”.